zazaki.net
20 Temmuze 2018 Îne
Girdîya Karakteran : 12 Punto 14 Punto 16 Punto 18 Punto
06 Temmuze 2018 Îne 09:33

RADYOYÊ BABÎYÊ MI

Nûrî Keleş

Yew radyoyê babîyê mi estbi, tim pê ajansê xeberan goşdarî kerdên. Markaya radyoyê babîyê mi Delta bi. Ge-ge pê Radyoyê Bexda yê kurdî zî goşdarî kerdên. Eger Eyşe Şan û Mehmed Arifê Cizrawî bivejîyayên û deyirî bivatên keyfê dadî û babîyê mi zaf pê ameyên.

Radyoyê babîyê mi zaf gird nêbi. Pê pîlanê girdan şuxilîyayên, di pîlê girdî girewtên. Radyoyê babîyê mi tim kulenga dêsî de bi û çewî destê xwu nênayên pa.

Serra 1984 de elektrîk ame dewê ma. Ez verê destê merdimê ke tesîsatê banan antê de bineyke xebitîyaya. Çiyo ke mi fam kerd, têlê elektrîkî zî eynen sey pîlan yew zêdek yew kêmek bî. Ampulî bi o qayde kewtên ta. Mi eno çî fam kerd la kamcîn hacet bi çend voltajî û çend amperî xebitîyeno mi nêzanayên, ez ça ra bizanî!

Keyeyê ma de yew kabloyo dixet û sipî estbi. Mi enê kambloyî ra qasê di metreyî girewt. Wexto ke babîyê mi keye ra şibi, ez şiya mi kulenga dêsî ra radyoyê babîyê xwu girewt ard. Mi pîlê ci vetî, sereyê yew kabloyî hetê zêdekî wa girêda, sereyo bîn zî hetê kêmekî wa. Mi xwu rê vatên hinî eno gure temam o, hinî ma herinda pîlan de bi elektrîk radyo şuxilnenê.

Mi radyoyê babîyê xwu serê xonça de na ro û sereyê kabloyan berd dekerd qulikanê prîzî de. La mi çîyê nêdî! Yew çizînî gina radyo ro, dima yew telpeyê dûmanî wurişt. Radyo veyşa şi.

Ez xwu rê cayê xwu de biya zuwa menda. Hela hela! Qey radyo wina bi?

Mi tu mana nêda ci. La çiyo xirabêr, de hinî ez senî destê babîyê xwu ra xelisîyena. Mi lezûbez kablo radyo ra vet. Pîlî dekerdî cayê înan û radyo berd cayê ci de rona.

Mi xwu rê va eger babîyê mi biyero vajo kamî eno radyo xeripnayo, ez do vajî xebera mi ci ra çin a.

Raşta zî şan de babîyê mi ame persa, mi va “Hayîyê mi ci ra çin a!”

Badê cû babîyê mi radyoyê xwu girewt berd Dara Hênî de tamîr kerd û ard. Mi ci ra pers kerd va “Se biyo radyoyî?” Babîyê mi va “Zereyê ci de yew têl qerifîyayo, mêrikî mi rê newe ra lehîm kerd viraşt.”

Mi hinî çiyo winayîn nêkerd.

Na xebere 469 rey wanîyaya
No nuşte hema şîrove nêbîyo.