Eşqî rê wext çin bi!...

Zimistan reyna bi boya sanikanê kokiman beranê Dîyarbekirî de beno meyman. Û vewre yew bi yew rayîrê heme kuçanê mi birnena. Der û dormeyê mi sey Dîyarbekîrî binê vewre de maneno. Dîyarbekir cemedîno. Ez cemedîna…

Şewe sey kardîya tuje ginena pîzeyê hewran ro. Û mîyanê zimistanî de asmênî dejnena. Şewe dejê yew eşqê bêwextî oncena zereyê xo. Sewdaya min a qedexîye şaristanî ser ro vila bena. Nika tarîya nê şaristanî de çeng bi çeng huyayîşî roşena. Laşerode bêwayîr çimanê mi de nêşikîno pay ra vindero, şemetîno ra gineno alişkanê mi ro. Alişkê mi, nê meymanê bewayîrî rê heme beranê xo kenê ra. Alişkê mi bêwayîrîye de musayî wayîrvejîyayîş.

Hezar serrî yê ke ez to pawena.

Tîya tenayîye rişîyaya riyê wextî ro.

Ti ke yenî, bêwext bê.

Tîya eşq bêkes o, vileçewt o.

Ti ke yenî, bi sixletîya xo bê.

Cemedê vewre bîyo adir, sêneyê mi de veyşeno. Ez veyşena. Dîyarbekîr veyşeno. Her roja Homayî zerrîya mi de adir, mezgê mi de talan esto. Kamcîn nenasî vato rengê sewda sîya yo? Ney! Mi rengê sewda çimanê awa Muzirî de dî. Mi rengê sewda bedenanê Dîyarbekîrî de dî. Rengê sewda sipî yo. Rengê sewda sipîyê vewre yo. Kam se vano wa vajo, ez zanan ke sewbîna rengê sewda çin o. Ax rengê sewdaya mi!… Nika sipî sewda mi rê qedexe yo.

Û ez, hezar serrî yê ke to pawena.

Tîya wisar sey payîzan gineno emrê merdimî ro.

Ti ke yenî mi rê yew huyayîşo rut bîya.

Tîya bawerî qedexe ya.

Ti ke yenî mi rê yew bawerîya kane bîya.

Rêça wela ma hîna sey nîkayî zerrîya mi de vinetî ya. Ez pê boya aye hedere bena. No pawitişê mi dirbetan dano zerrîya homayan ro. Ez bi bêvengîya goristanan duştê homayan de vindena. Bêvengîya goristanan her ca der a. Gilê ziwanê mi der a. Helmê mi der a. Domanê şewan deyîra şewdiran vanê bêvengîya mi de.

Verê çimanê mi de cuye veyşnenê.

Cuye rijnenê…

La cuye xo rê rayîra xo dîya.

Cuye qerîya yew pite de yena dinya.

Cuye yew gozêre de bena zergun, kok dana.

Û ez hezar serrî yê ke to pawena…

Yew gilê koyî de, yew dewa tale de kalikê mi mezele de naleno. Şewdirê yew şewe gineno çimanê mi ro. Hetê min o bê ezbet beno puç. Wayîrê sewdaya min a qedexîye, birayê huyayîşê mi; ma yewbînî de wela xo ra hes kerd. Ma çimanê yewbînan de qayîtê koyanê xo kerd. Û nika ez to pawena. Pawitişê mi bêpeynî yo. Ti her şewdir reyna-reyna zerrîya mi de êna rîyê erdî. Û ti bizane ke ez bi bêvengîya şarê xo yewna hezar serrî awiranê to yê fîrarîyan pawena.

Çunke her şîyayîş rayîra yew ameyîşî keno ra.

Çunke eşq bi pawitişê mi peyser êno nê şaristanan…