zazaki.net
29 Adare 2017 Çarşeme
Girdîya Karakteran : 12 Punto 14 Punto 16 Punto 18 Punto
20 Teşrîne 2015 Îne 23:38

BI XATIRÊ TO...

Necîbe KIRMIZIGUL

Wa zerrîya to rehet bikero, êdî ez to hêşê xo ra pak bikera. Ez zana çetin o! Fekê mi wina vano la zerrî do goştarîye bikero? Qet nêzana. Wa wijdanê to rehet bikero, xo baş hîs bike. Êdî ez to ra remena. Hetê kotî ya şina ez, nêzana. Tena remena! Mi rayê xo kerdê vindî! Peynîya rayan de ti nêbê se qet muhîm nîyo, ez ver bi kotî şîya… To rewna ra yo mi ra xatir waşt, ti mi ra kewte dûrî. Raşt a! Ma ti kewtî cuya mi? Ti qet nêameyî ke ti xatir biwazê. La ewro ez do to ra xatir biwaza. Ez do bişa dûrî kewa, qet nêzana. La ez do biceribna. Xora ez to ra dûrî ya, na rey hêşê xo, zerrîya xo ya bêbexte to ra dûrî fîna. Mi va ya ez do biceribna.

Êdî to teqîb bikera nêbeno. Êdî belkî ti mi rê qedexe yê. Êdî ti bi waştî yê, wayîra to esta, fikirîyayişê to mi rê qedexe yo. Ez mecbur a ke to goristanê zerrîya xo de wedarna. Hewna ke mi to ra xatir nêwaşto, ez hîsanê xo to rê vaja. Eke ez nêvaja ez do biteqa û bimira!

Zerrîya mi girîyena, hesrî sey varanî yenê war. Ez nêzana ke senî dest pêkera. Hesrê mi geyrenê hêşê mi ver, bermî ra ez nêşena ke çîyên vaja. To hesrê çimanê mi bidîyayê belkî to o wext bawer bikerdê.

Cuye mi rê nika çend bîya tale ti zanî? Her çî mi rê bêmana yo. Heme manayî to ser o yê. Eke ti bêrê heme çî beno temam. La ti çin ê, heme çî kemî yo! Seke winî aseno ke ti nîne êdî. Ez winî hîs kena ke ti yewna ra hes kenê. Ez şorî, ti şa be! Wa cuya to tal nêbo, ê mi tal bo zî beno. Ez qîymişê to nêbena, wa nenguyê to sî ro nêguno. Wa zerrîya to nêveşo ez vera to zî veşena. La fekê mi nê qalan keno. Hema ez do to senî xo vîr ra bikera, ez nêzana ke! Vengê deyirên kewno mi goş, yew şîîre kewna mi çiman ver, nameyê to vajeno!… Her çî mi rê xayinîye keno, to anê mi vîrî. Mi va ya, ez nêşena hîsanê xo îfade bikera. Eke ez vana hîs, zerrîya mi bena tenge, bena gurîya hesran sey varanî yenê war. Qet çîyênê to mi rê xelet nêaseno, ez qîymişê to nêbena. Yew to rê yew qale keno zerreyê mi veşena. Gelo nameyê ney çi yo? Eşq o! Ney ney! Ez eşqî ra bawer nêkena ke! Eşq esto ma?

Hema ez êdî to ra xatir wazena. Mi winî fehm kerd ke qalî qîm nêkenê qandê hîsanê mi. Bi vatiş a nêbeno. Xatir bi to hesrê zerrîya mi, xatir bi to adirê zerrîya mi, xatir bi to hesreta mi, xatir bi to rihê mi, xatir bi to şayîya nê canê mi, xatir bi to !...* 

Sêwregi, 08.02.2015

__________

*No nuşte, Newepel, Rojnameyê kulturî, hûmare 80, rîpel 6" de weşanîyayo. 

YASAL UYARI: www.zazaki.net kaynağında yayınlanmış herhangi bir haber, yazı veya fotoğrafın site editöründen izin alınmadan olduğu gibi kopyalanarak ya da üzerinde çeşitli oynamalar yapılarak herhangi bir yerde yayınlanması; farklı çalışmalarda alıntı olarak kullanmak amacıyla cümle veya paragrafların kopyalanmasında ise standart bir şekilde kaynak belirtilmemesi durumunda hukuki süreç başlatılacaktır!

 

 

Na xebere 4604 rey wanîyaya
No nuşte hema şîrove nêbîyo.